K 500. narodninam Caspara Peucera

Caspar Peucer* je so 6. januara 1525 w Budyšinje narodźił. Jeho nan, Gregor Peucer, běše bětnar (sudar), wobydler a měšćanski hejtman Serbskeje štwórće Budyšina. Casparowa mać, Otilija rodź. Simonec, pochadźeše ze starodawneje Budyskeje serbskeje byrgarskeje swójby, kotraž runja Peucerecom na Serbskej hasy bydleše. Mać Casparej serbšćinu nawuči, bohužel pak hižo zahe, w lěće 1540 zemrě. Z dźěćimi prěnjeho mandźelstwa nana Gregora z Otiliju a z druheho mandźelstwa z Barbaru rodźenej Stolz, měješe Caspar na 20 bratrow a sotrow, połsotrow a połbratrow. Mnozy jeho swójbnych stachu so ze zamóžnymi a nahladnymi wosobinami. Najznaćiši je dr. Gregorius Mättig, syn Margarety, najmłódšeje połsotry Caspara. Dr. Mättigowe skutkowanje jako lěkar, radźićel a dobroćel města hišće lětstotki dołho po jeho smjerći dale traje, na přikład ze załoženjom Mättigoweje załožby.

Za wuwiće reformacije w Němskej woznamjenješe Caspara Peucerowe ródne lěto wěstu cezuru. Krajnoswěrni započachu tehdy cyrkwinski system w němskich wjerchowstwach wutwarjeć. Dla zwady wo swobodnej woli mjez Erasmusom Rotterdamom a Martinom Lutherom, skónči so zhromadne postupowanje humanizma a reformacije. Dale wjedźeše zwada wo Božim wotkazanju mjez Martinom Lutherom a Huldrychom Zwinglijom k rozšćěpjenju reformacije do dweju křidłow. Tele napjatosće tež Peucerowe dalše žiwjenje wobwliwowachu.