Mały rjad Serbskeho instituta Budyšin, zešiwk 36, měrc 2024, 140 stron, němski přełožk Božena Braumannowa; redakcija Lubina Malinkowa, Theresa Jacobsowa; lektorat Karin Damaschke

W lěće 1993 wuda Dom za serbsku ludowu kulturu w Budyšinje knihu wo serbskich dudach, kotraž je hač do dźensnišeho standardne dźěło wo tutym instrumenće. Awtor běše Josef Režný (1924-2012), renoměrowany čěski dudák, hudźbny etnologa a załožer mjezynarodneho dudoweho festiwala w južnočěskich Strakonicach. W nalěću 2024 wuńdźe w »Małym rjedźe Serbskeho instituta« zešiwk pod titulom »Sorbische Geigen. Serbske husle«.

Při tym jedna so wo disertaciju hudźbneho etnologa a slawista Petra Ch. Kaliny, kotruž wón 2010 na uniwersiće w Brnje zakitowaše.

Tak předleži nětko standardne dźěło wo dwěmaj dalšimaj awtochtonymaj serbskimaj ludowymaj instrumentomaj. Wobě knize stej po wobjimje přirunajomnej: 140 resp. 160 stron. Po wuhotowanju je Kalinowa publikacija skromniša (brošura město kruteje wjazby, mjeńši format), za to móžeja ju zajimcy z webstrony Serbskeho instituta bjezpłatnje downloadować. A to so wupłaći!