zašłe měsacy běchu w serbskim swěće turbulentne a wupjelnjene z debatami wo identiće: Nadpady na serbsku młodźinu, feministiske wułoženja, přeće za respektom hladajo na starodawne tradicije, film Grit Lemke a naposledk kandidatura Serba za AfD.

Mjeńšina, na kotrejž přeco hišće dystopiska powědka wo wotemrěću lěpi. Ale bohowce budź dźak, zo naličenje znazorni, kak žiwe a diwersne smy. Njejedna so potajkim wo zamjerznjenu, stajnje přezjednu a zawrjenu skupinu.

Serbske identity su wjelorake a hybridne.

Je ćežko, zhromadnu identifikaciju wutworić. Móžemy so lochce mjez sobu zranić, w tym, zo tradicije do prašenja stajimy abo serbskosć druheje wosoby prosće njepřipóznawamy.

Telko rozkwěkanych a njejasnych swójbnych biografijow, telko hańby a zdobom hordosće a spjećowanja. Přiznaju, zo sym połna lubosće a tola začuwam runočasnje wotstorčenje a zranjenje mojich hódnotow.

Z Grounded Theory wuchadźa zapřijeće namjezneho objekta. To je »něšto«, štož mnoho akterow zaběra, bjez toho, zo dalše zhromadne kajkosće mjez nimi wobstałe. Kooperacija bjez konsensa. Te »serbske« je tajki namjezny objekt. Zhromadnje so wo wobstaće toho »serbskeho« prócujemy. Začuće zwjazanosće je, so jako serbska a serbski identifikować. Hladajo na druhe wobłuki pak přiwšěm njepřezjednosć knježi.

Mórski šlink Cypraea, bóle znaty pod mjenom kawrijowy abo pórclinowy šlink, nima, byrnjež so dołho a po wšěm swěće jako debjenka abo amulet wužiwał, hač do dźensnišeho jemu přistejace městno we wědomosći. Ale přez mnohe namakanki, někotre publikacije a wobkedźbowanja jeho wužiwanja w přitomnosći je móžno tež dotal njepřeslědźeny fenomen mušlowych gratow serbskich katolskich křižerjow zarjadować a skedźbnje dodnić. Najprjedy chcu zažne wužiwanje kawrijowych mušlow w srjedźnej Europje w zažnym srjedźowěku předstajić, zo bych zmóžniła zastup do swojeho slědźenja a swojich tezow.

Wot hdy wužiwaja so kawrijowe mušle w Serbach? Na tute jara centralne prašenje njeje so dotal spokojaca wotmołwa našła. Přehladanje dokumentow w archiwach Budyskeho regiona njeje do dźensnišeho nowe dopóznaća přinjesło. Z přepytowanymi archeologiskimi namakankami a z přez to widźomnej kulturelnej wuměnu móžeja so mušlowe graty tematisce zakružić a zakład za wułožowanje tworić.

Zažnosrjedźowěkowske namakanki wot Alpow hač do Šwedskeje

Ze zažnosrjedźowěkowskich rowow a ze sydlišćow sewjernje Alpow eksistuja mnoho namakankow kawrijowych šlinkowych chěžkow. Wažny aspekt tutoho zažneho wužiwanja w stawiznach je daloki wikowanski puć z ćopłych indopacifiskich wodźiznow.1 Woni stanu so z tym z indikatorom za wikowanje w zažnym srjedźowěku z arabskim a indopacifiskim rumom a jeho mjezystacijow.2 Heterogene skupiny3, kotrež pokazaja słowjanske wobsydlenje wobeju Łužicow, přińdźechu na swojim puću do tuteje kónčiny na wšelake městna, hdźež su so kawrijowe mušle namakali.4 Wuchadźa so z toho, zo je so wobsydlenje přez Słowaksku a Madźarsku w druhej połojcy 6. lětstotka a dale přez Čěsku wotměło.5