Je to hra

Hra ze słowami, hra z pismikami, hra ze smuhami

Kotrež so po nocach honja

We wočach so zybola

Refleksija

Z bliska a z daloka, zwjeršna a hłuboka

Je to refleksija

Dnja, tydźenja, měsaca

Sym za styskom honiła

Wobłudnjaca kreatiwita

Je čakała

Za woknom, počina so zhrabać

Bóh dał, zo njezabudźe kabat

Sej zdrasćić

Je to škitaca woršta

Skići škit šumliwym

Paducham wuměłstwa

Spodźiwna to kombinacija?

Njebych wědźała

wšako

Zda so być zabyta

Ta kreatiwita

   NADJA BRĚZANEC [12.11.2021]

Młodźina – njejsmy ženje mučni wo njej rěčeć, na nju zhladować, ju zrozumić spytać. Kotry wuznam ma přichodna generacija? Tajka horda, zapleńčena – z tójšto žadanjemi a na kóncu jenož błudnymi myslemi, nic? Gen Z – wot digitalneho swěta wotwisna, wobwliwujomna – kak maš ju chutnje brać? Mysle to, kotrež su kóždemu hižo raz přez hłowu čampali. Bjermy so na kedźbu, zo so tam njewusydnu, hórje hišće: w (pod)wědomju tčacy njewostanu.

Młodźina njeje zhubjena a tež nic jeno produkt wobswěta. Sym přeswědčena, zo tuta generacija kóždemu na wutrobje leži. Jedna so zawěsće wo starobnu skupinu z tójšto ekstremami a njewěs- tosćemi. Tola dyrbimy wuknyć, potencial generacije spóznać a podpěrać. Hdyž na młódšich dale z paternalistiskim, wothódnoćacym widom zhladujemy, budźemy so do ruina kopać. Starych w našej towaršnosći bywa dale a wjace a z tym tež hórkosć a bjeznadźijnosć přiběra, tak zo so skónčnje energija, inowatiwnosć, diwersita a wćipnota cyłeho čłowjestwa podusy.

just we wokomiku

wobroći so wutroba

do sewjera

a zaklinča

zynki njewjedra

chcyćiweje žarliwosće

tola padnje rozsud:

wutroba do juha

sypnje so začuće winy

błyšć jaskraweje nadźije

widźomny

NADJA BRĚZANEC