Štó so rady na nju njedopomina, na serbsku dźiwadźelnicu Janinu Brankačkowu, kotraž je na jewišću Němsko-Serbskeho ludoweho dźiwadła serbski a němski publikum z jeje přeswědčacym hrajerskim wukonom zawjeseliła. 24. apryla woswjeći wona w Budyšinje swoje sydomdźesaćiny.

Někotryžkuli lubowar dźiwadła rady na jeje wustupy na jewišću spomina, z kotrymiž je wona w najwšelakorišich figurach, wosebje pak w rólach maćerjow a wowkow, zamóhła publikum putać a zahorjeć. Jeje poslednja róla jako přistajena dźiwadźelnica w NSLDź bě 2013 w serbskorěčnej inscenaciji »Kaž w njebjesach« a bórze potom hižo jako hóstna hrajerka 2014 w němskorěčnej inscenaciji hry »Wie im Himmel« wot Kaya Pollaka. Tola Budyšanka skutkowaše po zastupje do předrenty hišće dale w hóstnych rólach, doniž so 2016 z mjeńšej rólu maćerje w musicalu »My fair Lady« wot dźiwadźelenja njerozžohnowa a sej nětko rjany a spokojny čas rentnarki popřewa.