Serbski ludowy ansambl je loni, 30. nowembra 2024, inscenaciju »Smy! – Bin ich?« na žurli w Budyšinje zahorjenemu publikumej prezentował. Lětsa ma serbski publikum znowa šansu rejowanski kruch wopytać. Jeno balet sam, bjez přewoda orchestra abo chóra, zamó přihladowarjow wot prěnjeho wokomika sem putać. Prapremjera bě so połdra lět přihotowała. Za kruch, kotryž so ze serbskej identitu rozestaji, je choreografka Gundula Peuthertowa interviewy hromadźiła. Je z Hornjo- a Delnjoserbami, Němcami a z ludźimi w starobje mjez dźewjeć a 94 lětami rěčała. Prašeše so, što jich z druhimi zwjazuje a što jich wot nich dźěli. W kotrej rěči sonja a što sej za swój narod přeja. Režiserka chcyše serbskosć začuwać a so serbšćinje dodnić. Nastał je wobraz nahlady, kotraž so we wutrobach ludźi chowa. A to je pola wšěch přeće a žedźba, zo so serbšćina njezhubi, tak zjima Peuthertowa swoju rešeršu. Dopóznaća přenjese do rejowanskeho krucha. Projekt interviewow pak tak rozrosće, zo so rozsudźi tute w přewodźacej wustajeńcy zjawnosći spřistupnić. Tak rjec jako dokument swědkow časa. Wjace hač 20 nahrawanych hodźin běchu za publikum w mało skrótšenej formje z pomocu monitorow a słuchatkow w rumnosćach ansambla