Pozdatnosć jeba,

to přisłowo wě.

Tute sotry, mandźelske a maćerje su pilne žony,

njejsu zwólniwe wótku do žita ćisnyć.

Samo hdyž maja riwalizować, so při wšěm podpěraja,

wšako zjednoća jich prěnjotnje wšědny dźeń wikowarkow,

bóle hač zadwělne pytanje za nadhódnotu

a wubědźowanje w blišej wokolinje,

jednoća je přeće, potomnikam žiwjenjakmany přichod zaručić,

kiž je jim wjace hódny hač kopjenje zamóženja.

Wothladajo wot wšěch wonkownych zwobraznjenjow

njejsu wiki w tropach dźiwja kupa spytowanjow,

hdźež sylni słabych zežeru,

njejsu tež arena gladiatorow,

hdźež wostanu mordarstwa, eliminacija a wutupjenja jeničke prawidła.

AIMÉE NGUEMTCHUENG

z němčiny/francošćiny RÓŽA DOMAŠCYNA

Aimée Nguemtchueng je doktorandka Uniwersity Yaoundé a Wysokeje šule Žitawa/Zhorjelc. Jeje basnje nastachu w korespondency z wustajeńcu »Kamerum z wočomaj tysac žonow«, kotruž je zhromadnje z jeje kralowskej dostojnosću, Esperance Cadé, maćerju krala­, zestajała. Wustajeńcu pokazowachu w septembrje w galeriji FLOX w Korzymju, we wo­błuku Region přichoda Sakska-Pólska-Čěska republika a Łužiskeho festiwala 2021.

Přisłušnicy mócneje maćerje přirody,

ći Pygmejscy we wuchodnym Kamerunje,

kaž ći Bamounjenjo z Nouna,

wšojedne hač su Baka abo Maka,

čuja so ze samsneje pupownicy a přiwuzni.

Sedźa při winje, kiž rěka Odontol,

jeho škódny wliw na čłowjeka je znaty.

Tući Baka a Maka mrěja kaž słomjany woheń,

pomału sapotajo doskónčnje wuměraja.

Z lěsa wućěrjeni,

dźiwjemu kapitalizmej moderneje towaršnosće poddani,

nimaja ani jeničkeho orientaciskeho dypka.

Wisaja zadwělnje na tymle napoju,

kiž ma móc, hrubosć swěta zabyć dać.

Wokatej woči, z prócu hladajo, pohlad w dalinje zhubjejo

abo stajnje hišće někajki cil pytajo.

Kóždy čłowjek wuprudźa po swojim poraženosć a zaprajenje.

Hubje skulojćenej w klasiskej, kulowatej,

we wobłuku Amora abo eliptiskej formje.

Wšelakorosć nima ničo z inteligencu činić.

AIMÉE NGUEMTCHUENG

z němčiny/francošćiny RÓŽA DOMAŠCYNA