Najwjetši němski spisowaćel našeho časa, kaž jeho druzy tež mjenuja, Thomas Mann, swjeći lětsa jubilejej: Wón narodźi so před 150 lětami, mjenujcy 6. junija 1875 w Lübecku a zemrě před 70 lětami, 12. awgusta 1955 w Zürichu.

Jeho zawostajenstwo je jara wulke a wjelestronske, w lěće 1929 wuznamjenichu jeho z Literarnym Nobelowym mytom: Romany, nowele, powědančka, eseje, narěče, nowinske nastawki, listy, přednoški, dnjowniki, interviewy … Tohodla we Wikipediji, ale tež w encyklopedijach (mam hišće cyły Brock-haus!) jara wjele wo nim pisaja. Nochcu tu pak ničo dodać abo wotpisać. Tež biografojo su wo nim pisali – Wikipedija naliči wosom biografijow. Tomu přidruži so jara wjele knihow wo jeho dźěłach a skutkowanju. Tohodla sym dołho přemyslował, što scyła wo nim napišu.

W Brockhausu pisaja wo jeho tworjenju: »Thomas Mann, kotryž słuša k najwuznamnišim powědarjam němskeje rěče w 20. lětstotku, pokročowaše powědarsku techniku 20. wěka (wosebje L. Tolstoja)«. A wo jara wobšěrnym wobjednanju romana ›Dr. Faustus‹ steji we Wikipediji sćěhowace: »Jako dalše žórło inspiracije mjenuje Thomas Mann zetkanje Iwana z čertom w romanje Dostowjewskeho, ›Bratřa Karamasow‹.« Rozmołwa z čertom twori wšak wjeršk tutoho romana!