Na čo mysliće, hdyž tute słowa čitaće? 1989/90? Snano na njedawno wušłu publikaciju z podobnym titulom? Kak wjele lubjace klinča słowa tež nětko za čas koronapandemije. Swoboda pućowanja abo schadźowanja pak měnjena njeje. Jedna so wo citat Arnošta Barta w Serbskich Nowinach 22. februara 1919. Zahorjeny rozprawja wo měrowych jednanjach w Parisu a lubi Serbam bórzomne noworjadowanje politiskich poměrow we Łužicy. Citat je zdobom titul noweje pućowaceje wustajeńcy Serbskeho instituta wo narodnym hibanju Serbow a mjeńšinowym prašenju po 1918.

Žurnalistam bě přeprošenka na njewšědne hodowne čitanje profesora za mašinotwar witana, hdyž za spodobnymi, přiwšěm wěcownymi temami pytachu. Na přikładźe tłuskačow rozkładźe profesor swojim studentam na nazorne a tróšku zabawne wašnje zasady konstrukcije mašinow. Z medijow zhoni profesor za resursowy management na samsnej uniwersiće wo dźěle kolegi a jeho za swój projekt w Keniji zahori. Tam trjebachu mašinu za ekologiske, ekonomiske a awtomatizowane tłuskanje makadamijowych worjechow. To bě njezwučene wužadanje za profesora. Da so do dźěła a wuwi ze swojimi studentami mjeztym patentowanu techniku. A Keničanam w kooperatiwje zwostanje wjac dobytka za fairtrade produkt.