Sobotu, 3. nazymnika 2024, woswjeći chór Budyšin swoju 60. róčnicu załoženja. W lěće 1964 běchu Serbja přeprošeni na kulturnu wuměnu do Jendźelskeje. Jan Handrik wupyta za to z Janom Bulankom serbsku delegaciju spěwarjow, zo bychu Serbow na dostojne wašnje reprezentowali. Swědomiće wšitcy zwučowachu, a to zwjetša pola Handrikec doma. Spěwarki a spěwarjo podachu so 7. julija 1964 na lětanišćo do Berlina. Tam pak zhonichu, zo so chórej wulět njedowoli.

Tuž so přesłapjeni z Berlina nawróćichu. Na dompuću w busu pak zrosće ideja, w Choćebuzu pozastać a tam w serbskim studiju nazwučowane spěwy nahrawać. Dokelž bě so to derje zešlachćiło, běchu sej přezjedni, zo pod wuměłskim nawodom Jana Bulanka nowy serbski chór załoža. A tak so sta, zo so z toho časa Serbja z cyłeje Hornjeje Łužicy prawidłownje po póndźelach w rumnosćach Serbskeho ludoweho ansambla w Budyšinje zetkaja, zwučuja a zwjetša štyrihłósnje spěwaja.3CCCbild1\"/>

Wosebje dobry kontakt ma chór Budyšin w poslednich lětach do Bukec. Tuž njebě žadyn dźiw, zo jich organizator Bukečanskeje »Bjesady« Mato Krygaŕ do wjesneje hospody přeprosy. Jemu poboku steješe Kulturu spěchowace towarstwo w Bukecach pod nawodom Domaša Žura, kotrež hosći koncerta z wuběrnym tykancom a słódnym kofejom pohosći a překwapi. Tež Domowina bě jako nošerka projekta nazymskich koncertow chwalobnje zakótwjena.