Rozgrono z Carstenom Jacobom, jadnarjom Euroregiona Sprjewja-Nysa-Bóbr z. t.

Což kuždemu nadpadnjo, gaž zastupijo do Wašogo běrowa, jo mólba cerkwje. Ma wóna wósebny wuznam za Was?

Pśi tom Bóžem domje jadna se wó »Cerkwju wěrneje naźeje«, kótaraž jo we wejsnem źělu Nowa Wjas gmejny Gatojce we wokrejsu Sprjewja-Nysa. Wěm, až jo mój prastary nan Wilhelm Jacob, kótaregož njejsom sam zeznał, w 1950tych lětach twaŕ rozsudnje pódpěrował a slědkoju pśepódał ako mejstaŕski polěraŕ generalnemu superintendentoju 14.11.1954 pśi swětosnem wuswěśenju cerkwiny kluc.

Wobraz jo, pśipódla gronjone, wót pólskeje wuměłcowki Jadwigi Polewskeje darjony.

Źěl Wašeje familije póchada z wótbagrowaneje jsy blisko Chóśebuza. Móžośo nam pitśku wěcej wulicowaś wó toś tom městnje a jogo stawiznach?

Źěl mójeje familije z maminego boka jo póchadał z Liškowa a jo se w casu 1976/77–1983/84 bóžko dejał pśesedliś dla wótwórjoneje brunicoweje jamy Chóśebuz-pódpołnoc. Móje prědowniki su tam měli wjeliku bursku žywnosć, kótaraž jo była pód mjenjami Jašan, Herrmann a Adam wót stolěśow dłujko we wobsejźenju familije.

Mógu z wěstosću groniś, až jo naša familija tam bydliła nanejmjenjej južo wót srjejźi 17. stolěśa. To jo mjazy drugim dopokazane pśez ludlicenje lěta 1652, stakim krotko pó kóńcu 30-lětneje wójny.